“Thirrje për zgjim”, OKB-ja do ta nxjerrë raportin më të rëndësishëm në botë për ndryshimet klimatike

Raporti më i rëndësishëm i dalë ndonjëherë në botë për ndryshimet klimatike do të publikohet se shpejti, duke përcaktuar realitetin e zymtë të gjendjes së planetit, raporton BBC.

Studimi është bërë nga Paneli Ndërqeveritar për Ndryshimet Klimatike – një grup i OKB-së që analizoi më shumë se 14,000 punime shkencore.

Do të jetë vlerësimi më i azhurnuar se si ngrohja globale do të ndryshojë botën në dekadat e ardhshme. Shkencëtarët thonë se ka të ngjarë të jetë një lajm i keq – por me “grimca optimizmi”.

Dhe ekspertët e mjedisit kanë thënë se do të jetë një “thirrje masive zgjimi” drejtuar qeverive për të ulur emetimet.

Hera e fundit që IPCC studioi për ngrohjen globale ishte në vitin 2013 – dhe shkencëtarët besojnë se kanë mësuar shumë që nga ajo kohë. Vitet e fundit, bota ka parë temperatura rekord, zjarre të tërbuara dhe përmbytje shkatërruese.

Disa dokumente të studiuara nga paneli tregojnë se disa nga ndryshimet që njerëzit po bëjnë pa dashje në klimë nuk do të rikuperohen për qindra apo ndoshta mijëra vjet.

Gjetjet e IPCC – të cilat do të zbulohen në një konferencë shtypi, do të përdoren gjithashtu gjatë një samiti të madh të organizuar nga Mbretëria e Bashkuar në nëntor.

Samiti, i cili drejtohet nga OKB -ja, shihet si një moment kritik nëse ndryshimet klimatike do të vihen nën kontroll. Udhëheqësit nga 196 vende do të takohen për të pajtuar veprimet.